आजीची आठवण

तुझ्यावर काहीतरी लिहावं
असं वाटत होतं कितीतरी दिवसांपासून
पण लिहायला बसलं की
आठवणींच्या पुरात मीच जायचे वाहून!

अश्रु पुसायला फक्त
एकाच गोष्टीची गरज असते
आणि त्या मायेच्या पदराची उणीव
सतत आम्हाला भासत असते!

तुझ्या स्वयंपाकाची सर
कधीच कशाला आली नाही
साधा तो दहीभात सुद्धा, का गं
आता आम्हाला मिळणार नाही!!

आजीपेक्षा सुद्धा तू
माझी जवळची मैत्रीण होतीस,
फक्त मी कितीही चिडले-रुसले
तरी तू मात्र रुसत नव्हतीस!

पण आता मात्र तुझ्या रागावण्याची
अगदीच हद्द झाली
खरं सांग, तुला नाही का गं
आमची कधी आठवण आली?

अशा प्रश्नांची उत्तरे मिलणं
फार फार अवघड आहे
पण तरीसुद्धा एक गोष्ट
मला पक्की माहीत आहे,
जरी समोर नसलीस तरी
सतत तू आमच्या पाठीशी आहेस!
शरीराने बरोबर नसलीस तरी
मनाने कायम आमच्यातच आहेस!!

दिवाळी

दीपावलीच्या आगमनाने सर्वत्र
पसरतील रंगीबेरंगी दिव्यांच्या माळा
पण मिटवू शकतील का त्या
दहशतवादाच्या अंधाराला?

विविध पदार्थांच्या सुवासाने
पाणी सुटेल तोंडाला
पण भागवू शकेल का हा फराळ
भ्रष्टाचाराच्या भुकेला?

फटाक्यांची दारु उडवून
मिळेलही आनंद काही जणांना
पण थोपवू शकेल का ही आतषबाजी
काश्मीर मधल्या असंख्य आसवांना?

चला तर मग सगळे मिळून
करू एकच प्रार्थना ईश्वराला
मिळूदे सुख, समाधान व
शान्ति ह्या जगाला!!

एक नातं- मैत्रीचं

एक नातं
शब्दांच्या पलिकडलं
मौनाताल्या स्पन्दनांनी
मनातलं गुपित ओळखणारं

एक नातं
खूप धीर देणारं
स्पर्शाविनाही
जवळ घेउन समजावणारं

एक नातं
दिलासा देणारं
आपल्याला स्वतःचीच
नविन ओळख करून देणारं

एक नातं
नावाचं कुंपण नसणारं
क्षितिजाच्या कुशीत
हळुच जाउन विसावणारं

आठवण

सान पहाट किरणांची
गार वाट ती धुक्याची
वाफ आल्याच्या चहाची
काढ़े आठवण तुझी !!

रम्य दीस ते कोंलेज़चे
नव्या -जुन्या सोबत्यांचे
वडा -पाव च्या पार्टीचे
काढ़े आठवण तुझी !!

कट्यावरील गप्पा -गोष्टींचे
खोट्या हसण्या -रुस्ण्याचे
काही चोरट्या कटाक्षांचे
काढ़े आठवण तुझी !!

क्षण वर्गातल्या खोडयांचे
प्रश्न नको त्या परीक्षांचे
मार्क्स काठावरल्या पासींगचे
काढ़े आठवण तुझी !!

आज जरी नाहीस तू इथे
तुझ्या नयनी मला दिसे
त्याच काळातील ठसे
काढ़े आठवण माझी !!

मुलींच्या शाळेचा पहिला दिवस (मी कामानिमित्त परदेशी असतांना)

माझ्या चिमण्या पिल्लांची
आज सुरु झाली शाळा
अनोळखी वाटेवर
नको रडू माझ्या बाळा

नविन कपडे, नवी पुस्तके
आणतील गोड हसू गाली
नव्या सख्यांशी खेळता
जाईल डोळ्यातील पाणी

बाबा, आजी, मावशी
असतील आणावयास आलेले
सुरात ऐकवा त्यांना
बोबडे बोल शिकवलेले

जरी नसले मी तेथे
तुमची बोटे धरावया
आहे नज़र तुमच्यापाशी
हात आशीर्वाद द्यावया

पडो पाउल तुमचे
आता यशाच्या दिशेने
येईन धावतच मी ही
तेथे तुमच्या ओढ़ीने